آرزو لار دونیاسی

یالان دونیا 
yalan dünya

سنین بهره ن یئین كیمی دیر ؟
كیمینكی سن ؟ یئین كیمدیر ؟
سنه دوغری دئین كیمدیر ؟
یالان دونیا ، یالان دونیا

Sənin bəhrən yeyən kimdir ? 
kiminki sən ? yeyən kimdir ?
sənə doğru deyən kimdir ?
yalan dünya , yalan dünya !

سنی فرزانه لر آتدی
قاپیب دیوانه لر توتدی
كیمی آلدی ، كیمی ساتدی
ساتان دونیا ، آلان دونیا

آتی ازل داغا سالدیق
یورولدوقجا ، دالی قالدیق
آتی ساتدیق ، اولاغ آلدیق
یه هر اولدی ، پالان دونیا

ati əzəl dağa saldıx
yoruldıqca , dalı qaldıq
ati satdıq ulağ aldıq
yəhər oldi , paan dünya ! 

بیری آینا ، بیری پاس دیر
بیری آیدین ، بیری كاس دیر
گئجه توی دیر ، سحر یاس دیر
گول آچدیقدا ، سولان دونیا

biri ayna , biri pasdır
biri aydın , biri kasdır
gecə toydır , səhər yasdır
Gül açdıqda , solan dünya !

ایگیت لرین باشین یئیه ن
قوجالار بوز باشین یئیه ن
قبیر لرین داشین یئیه ن
ئوزو یئنه قالان دونیا

Igitlərin başın yeyən
Qocalar boz başın yeyən
Qəbir lərin daşın yeyən
Özü yenə qalan dünya !

نه قاندین ، كیم گول اكن دیر ؟
كیم قیلیج تك قان تؤكن دیر
تیمور ، هله كوره كن دیر 
چنگیز جانین ، آلان دونیا

Nə qandın , kim Gül əkəndir ?
Kim qılıc tək qan tökən dir !
Teymur hələ kürəkəndir ,
Çəngiz canın alan dünya

یامان قورقو ! ییغیلایدین !
طوفان لاردا یوغولایدین !
نولئیدی بیر داغیلایدین
بیزی درده سالان دونیا !

Yaman qurqu ! Yığılaydın !
Tufanlarda boğulaydaın
Noleydi bir dağılaydın
Bizi dərdə salan dünya ! 

چاتیب سندن كؤچن كئچدی
اجل جامین ، ایچن كئچدی
اولان اولدی ، كئچن كئچدی
نه ایستیردین اولان دونیا

Çatıb ! səndən köçən keçdi
əcəl camin içən keçdi
olan oldi , keçən keçdi
nə istirdin olan dünya !?

بوغلایدین ، دوغان یئرده
دوغوب خلقی بوغان یئرده
اوغول نعشین اوغان یئرده
آنا زولفون یولان دونیا

boğlaydın , doğan yerdə
doğub xəlqi doğan yerdə
oğul nə'şin oğan yerdə
ANA zülfün yolan dünya !

قازانیب ، هی تالانیب سان
قالانیب هی جالانیب سان
ازلدن چالخالانیب سان
یئنه ده چالخالان دونیا

Qazanıb , hey talanıbsan
Qalanıb hey calanıbsan
əzəldən çalxalanıbsan
yenədə çalxalan dünya !

ننه قارنی ، ایلك بئشیگون
قبریستانلیق ، سون دئشیگون
نه ایچه رین ، نه ائشیگون
قارانلیق بیر دالان دونیا

nənə qarni , ilk beşigün
qəbristanlıq , son deşigün
nə içərin ! nə eşigün !
qaranlıq bir dalan dünya !

سنی بایقوشلار آلقیشلار
ده لی ویرانه نی خوشلار
دولان عقله سنی بوشلار
ایچی بوشلا ، دولان دونیا

səni bayquşlar alqışlar
dəli , viranəni xoşlar
dolan əqlə , səni boşlar
içi boşla , dolan dünya !

سنه قارونلار آللاندی
قیزیلدان تللی قالاندی
باتیب ظولوماته قویلاندی
اولوب تللی تالان دونیا

sənə qarunlar allandi
qızılda təlli qallandi
batıb zülümatə quylandi
olub təlli talan dünya !

اوجاق ایكن سؤنونموشسن
چاناق ایكن چؤنونموشسن
نه پیس قاری ننه ایمیش سن
ناغیل ! یالان ! پالان دونیا

ocaq ikən sönünmüşsən
çanaq ikən çönünmüşsən
nə pis qarı nənə imiş sən
Nağıl ! Yalan ! palan dünya !

شاعیر : اوستاد شهریار 
şair : ustad şəhriyar